2月5日，大致多雲及有一兩陣雨，沿岸有霧，早上天氣稍涼。下午部份時間天色明朗，天氣潮濕溫暖。美國股市上周喺重量級科技股業績表現理想下持續做好，三大指數以接近紀錄高位收市，市場本周焦點仍然係藍籌上季業績。三大指數上周累計仍升1%。美國本周經濟數據方面，較受曯目係今晚公布嘅美國供應管理協會（ISM）1月服務業指數終值。而美匯指數重返104水平，人民幣今早離岸價跌至7.22水平。

A股除咗歐美資金持續外逃，公司主要股東亦不斷沽貨，內地基金為應付贖回亦沽埋一份，股民為減少損失當然都係沽貨，人人沽貨令A股弱過藥煲。上週五A股三大指數下跌1.46%至2.43%不等，即使國家隊入場托市嘅上證，上周從高位竟然出現五連跌，直接穿底。創指再跌2.43%至1550，去年9月時創指2000點是話係鐵底，4個月過去鐵底變鐵頂，累計跌幅達23%。

資金轉投日股印股

大家齊齊沽A股，內地市場資金究竟去咗邊？留意最近內地嘅海外股市ETF竟出現5%至15%不等溢價，ETF係被動式追蹤指數基金，理應不存在所謂溢價問題，因為有溢價，基金就會多發行股數，流入資金被動式買入相關資產，如目前的海外股票。據了解，中港股市無運行，更多內地資金沽中港基金，換馬至其他市場，目前日本股票ETF出現超過10%溢價，成為內地資金新寵。另外印度股市屢創新高，亦成為內地資金熱門追捧對象。情況反映內地散戶並非真係缺錢，反而係喺中港股市輸到怕，寧願轉投其他市場。

至於港股，早前指恒指升至16200已乏力，因為唔見有新資金流入，歐美資金唔會高追，北水上周五再淨賣出40億港元。歐美唔買，北水唔買，偷步炒上嘅港資已開始沽貨離場，港股成交回落至1,031億元。

港股表現疲弱，上周五於ADR跌破15400水平，夜期則險守15400，較周五收市價再跌逾百點，預料今日港股低開。上周一恒大（3333）終被勒令清盤，市場擔心其他正進行債務重組嘅內房受影響，清盤之事陸續有嚟，港股反彈舉步為艱，按周更再跌419點。

恒指連續三日都未能收高於10日線，港股上周五高開但多條移動平均線得以復失，若短期未能升破上月高位17135，或略升穿即回落，後市再跌穿14597點，即22年低位，後市恐跌至14000甚至更低水平。今日需守15400關，15300至15400為即市支持，而即市阻力為15600至700，即10日線15674及5日線15673匯聚區，20日線15793即15800阻力更大。

---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁：https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ