由細開始，老師不停灌輸一個必須面對的現實，凡參賽就會有輸贏。球賽如此、奧林匹克所有項目如此……當然，投資也百分百如此！世上哪有必賺的投資（騙徒往往利用「必賺」作為引誘無知貪婪者的餌）？
上兩周與不同圈子老友團年，凡觸及投資，個個皆喊晒咁口，唉聲歎氣。點解？你知我知，過去3年除揸咗政府的銀債、綠債及iBond外，幾乎所有投資，皆蝕到一仆一碌，包括買內企債券、各式私人基金、股票、物業……無論你幾巴閉，只要一出手就一定損手！
人人損手 尤其股票及物業
個個問：「碌sir，點睇啊？好慘呀！」慘乃大圍事，尤其買股票及物業！你會叻得過金管局的國際級投資顧問或香港最大地產商？當然冇得比。咁請請睇睇，金管局去年在香港股票方面，也要蝕155億！
地產商又如何？各公司股價已全面反映！總之講蝕本，就是「人人有份永不落空」！既然係咁，有乜好怨有乜好喊？
小弟的投資分享班開宗明義講：「唔投資，不會蝕。一投資，歷史紀錄，強如專業基金經理，也有大半是蝕的！」其實，凡散戶皆有知——不可能長期在股市上得到利潤（短期一兩次波動則會），但仍然個個如蟻附羶，點解？揭穿了，根本是「賭癮」作怪，個個唔「賭」唔舒服，有如馬迷，一場輸完，絕不會戒賭，而是寄望下一場翻本。
有了呢種心態，自然賭完又賭，輸完再輸。邊個贏？做莊抽水那個！
切勿讓股市影響正常生活
我的心態又如何？長年追隨股神巴菲特及其終身拍檔芒格的信念。買股票絕不胡亂落注，不會「聽消息」、「聽號碼」、「聽財演亂噏」，必定仔細研究公司的管理、理念、市場、強項、前景及可有政府政策「保護」，這個大概是股神的價值投資法了。另外，更要告誡自己，切勿受股市波動影響正常生活及情緒。所以當決定買入一隻股票時，就要堅守芒格信念——若你不能抵受持有的股票因大市調整而跌一半的話，切勿投資！
新一年，我的原則繼續，也希望能幫到大家。
資深傳媒人 曾智華
---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁：https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
