陳浩民罕談舊愛阿佘：佢不嬲係女王 16年前嫌TVB人工奀不歡而散首解畫丨獨家

54歲，曾演過不少經典角色的陳浩民，相隔16年重返娘家拍新劇《狀王之王》，客串演「陳夢吉」。咁啱得咁橋，離開TVB 7年的佘詩曼亦回歸拍《新聞女王》兼三奪視后成為史上第一人。提到阿佘，坦言少睇電視的人夫陳浩民答得大方：「佢不嬲都係女王，未失敗過。」除了罕談舊愛，陳浩民甚至唔介意跟對方合作拍劇。採訪：方騫平攝影：錢文坤場地：QUE＠ELEMENTS圓方

因為識著衫，完全睇唔出陳浩民已54歲。

陳浩民罕談舊愛阿佘。

陳浩民內地有市場。

陳浩民否認當年跟無綫不和。

陳浩民大門為TVB常開。

陳浩民自2008年拍完古裝劇《搜神傳》後，便滿約離巢轉往內地發展，期間TVB從未打他主意，有傳當年陳浩民唱TVB人工太奀，搞到不歡而散。重提此事，陳浩民首解畫並冇否認：「咁當年外邊我有咁多工作做。」訪問中，他多次多謝TVB：「冇TVB冇我，今日仍可以喺內地企得住腳，因為《天龍八部》在內地好受歡迎，做人要飲水思源，所以今次拍劇都冇講錢，當係聚舊。」

陳浩民2008年拍完古裝劇《搜神傳》後滿約離巢。

處男作《天龍八部》同李若彤合作。

陳浩民演過《西遊記（貳）的孫悟空。

林子聰帶挈拍劇

對於離巢多年，TVB冇再向他招手，陳浩民就如此解說：「雖然我TVB出身，但經已唔係公司人，作為一間大公司當然有佢哋考量。」不過，他強調大門為TVB常開：「我好鍾意演戲，只要有戲做，演乜都得。」今次陳浩民能夠參與《狀王之王》，全因總導演肥仔聰(林子聰)帶挈，並非直接由TVB「委任」：「我同肥仔聰拍《濟公》，喺片場內我唔係一位八面玲瓏嘅演員，只會將心力放晒落場戲，點知搵到知音，兩人不謀而合撞出火花，加上我哋拍住上好好彩，面對大製作嘅對手都能逆流而上，搶埋收視冠軍，更開埋製作公司。多年來兩兄弟會互相關照，有乜好嘢預埋對方。」他又爆兩人的窩心經歷：「2014年林導幾經辛苦搵資金開拍《笑林足球》，有金主肯投資，但附帶條件用返佢嘅新人做男一，肥仔聰寧保住我而一口拒絕，真係感動，好彩年多後成事。」

陳浩民回歸TVB客串演《狀王之王》「陳夢吉」。

林子聰指定要他做《笑林足球》男一。

拍《濟公》結成好兄弟。

陳浩民有啲喜感。

在林子聰安排下，陳浩民演終極大Boss「陳夢吉」演得相當過癮：「雖然只係得45分鐘公堂戲，但落力地拍足4日，要用三寸不爛之舌嚟拗贏對方，仲要反派得嚟既搞笑又討好，真係好考演員魅力，喺語速、語調、感情上都要落功夫，我有加入一啲演《濟公》嘅元素。最開心林子聰話我嘅演出，搞到公堂入面個個都睇我演戲，今次演出好好玩，唔夠喉。」

陳浩民對王浩信的「宋世傑」讚不絕口。

《濟公》令陳浩民紅遍內地。

讚阿佘實至名歸

2002年陳浩民與佘詩曼合作電影《情緣汽水機》擦出火花，對於舊愛佘詩曼重返TVB拍《新聞女王》威到盡，陳浩民坦言婚後冇睇電視習慣，多年來對娛樂新聞非常冷感，返港定居後屋企連電視機都冇，又唔會click入去睇手機，只知《新聞女王》係hit，但唔知有幾hit：「都戥佢高興，佢不嬲都係女王嚟，套套中未試過失敗，預咗係佢攞，所以唔會感意外，係實至名歸。」問到日後有冇機會合作？他答得小心奕奕：「呢啲日後先算，唔係我同佢可以做到主，(咁會唔會介意合作？)我冇嘢，拍戲都係一份工作。」他強調家庭生活美滿，收工後返歸照顧4子女，幫老婆蔣麗莎做直播，又為13歲春春期囡囡做心理輔導。講到欣賞男藝人，他鍾意柏檔王浩信，亦喜歡同期出道的陳山聰。再問女藝人呢？他避忌說：「唔熟，要重新留意返，所以答唔出。」