上周《星島日報》國際版突變財經版，標題非常吸引眼球——《唾液認祖退潮 矽谷寵兒跌落神壇》！乜事？正是3年前一間美國基因檢測公司23AndME於2021年成功上市，揚言透過唾液樣本，即可幫助客人了解其遺傳基因、親屬關係及潛在風險訊息等。

「唾液派對」曲終人散

意念頗新，加上此公司由Google聯合創辦人布林前妻武伊齊茨基（Susan Wojcicki）掌舵，立時成為上流社會神話，名人社交界活躍人士，為顯前衛，紛紛參與「唾液派對」，令公司股價一度爆上，市值高達60億美元（約469億港元）。

豈料一如股神巴菲特名言——退潮時就知邊個無穿泳褲。熱潮是製造了，但實質業務又如何？華爾街「財經精英」及基金經理，最擅長聯同公關廣告界及「合唱團」股票評論員製造神話故事，搞到散戶如痴如醉，覺得唔買變老襯。結果當然炒到天高後，然後故事發展永遠如此，「奸人堅」一二三「水」散檔而去。

23AndME上市日已炒高兩成至13.32美元，但神話爆破後，如今只剩幾毫子美元！問你死未？屋漏更兼逢夜雨，去年11月納斯達克交易所向公司發出警告，若半年內股價上唔返一美元，即會除牌！

若你揸咗佢，會加碼定跳船？7年多前，小弟在本欄一再忠告讀者——股票、西瓜及蟹，唔識咪買！其實是源於一隻對我來講是「無厘頭」的股，聯旺集團（8217，現更名為萬民好物）於2016年4月上市，集資僅3,570萬元，配股價格為0.26元。

聯旺癲價後一地雞毛

此股未上市前，已有「合唱團」不斷用大股東的藝員女兒黃翠如來造勢。上市日翠如也高調亮相捧場，一時間聯旺由唔知係「乜股」變身成「明星股」，在幕後莊家發功下，炒到上300幾蚊，恍似火箭升空！呢鋪真的令人歎為觀止，個個大嗌：「嘩嘩，咁都得？」

一邊炒上時，不少朋友問：「碌Sir，入得過嗎？日日爆升，應否坐轉順風啊？」我見極度危險，才在本欄寫下——股票、西瓜及蟹，唔識咪買。結果聯旺在2017年初癲到升至近350元，如今一毫都唔值，你冇聽錯，係一毫都唔值！

曾智華

---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁：https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ