上周退休老友傻強喊咁口搵我呻：「碌sir慘呀，走晒大雞呀，比特幣又狂升，逼近7萬美元啦，我早想瞓身㗎喇，追唔追呢？點睇呀？」

退休者「有放過、冇殺錯」

小弟對退休者的再三忠告：「一定要保住老本，因此乃你安安穩穩行完人生路所依靠的。切勿多手、貪心去買一啲Too Good To Be True的投資產品。尤其你唔知點解佢咁「正」，又或者究竟乜葫蘆賣乜藥的，一概彈開。有放過冇殺錯！放過絕冇問題，肯定無損失，相反，一旦買錯，分分鐘搞到棺材本都冇埋，咁就晚年徒悲傷嘞！」

貪心，乃人的天性，無論幾叻幾巴閉者，都可能中招。講個真人真事畀大家知，一個我認識嘅人的故事。M哥為著名CEO，專業內叻到飛起，早早被大老闆賞識，不停加人工兼派花紅，四十歲晉身五千萬富翁行列。

「穩賺」8厘 貪字得個貧

某次晚飯佢意氣風發講：「阿碌如今我投資，只集中一種，每年穩賺8厘息，冇風險！不過必須要最少有五球（500萬）先得。你呢類公務員，冇得玩㗎喇！」

500萬對於中層公務員來說銀碼太大，兼且先父教落——便宜莫貪。銀行定期只得1厘息，「穩健投資」會有8厘？肯定魔鬼在背後！

不過M哥真的一帆風順，呢種「8厘息投資」，不只係佢，越來越多全城大富豪參與，變成潮流，人人賺到笑呵呵，咁筍去邊處搵？

發展下去M哥好快成億萬富豪，不停買物業，也因2006至2016年間樓價倍升，水漲船高，最輝煌時有5億幾身家。

佢睇睇大形勢，息口咁低，「穩賺投資」則年息8厘，你話最精明做法係點？正是向銀行以2厘至3厘息低息借貸，攞去賺8厘息的投資！一來一回有5厘咁好利潤，一億就年息500多萬、3億就1,600萬，真係打跛腳都有排歎，使乜打工咁戇居呢？

講到呢度，大家都應知小弟講緊乜。正是M哥由幾百萬到幾千萬再到五億，將身家性命財產加借盡，瞓晒落恒大債券！

點解以佢咁叻咁精明，都會認為一個Too Good To Be True的「投資局」是又真又可以永恆，故從不懂收手呢？一個字講完——貪！多少人就此葬身？

資深傳媒人 曾智華

---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁：https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ