電影主角是被譽為「雷鬼」（Reggae）音樂之父的Bob Marley，1945年出生於英殖時代的牙買加，是當地的民族靈魂及首位國際巨星，最重要佢擁有一顆愛與自由嘅心，就算身處槍口下都未驚過，為對抗殖民主義與種族主義發聲，令「雷鬼」影響遍及全球。唔太熟Bob Marley，但歌好聽，預告亦好睇，不過，歌手傳記片唔容易拍，要有根有據有娛樂性，太誇讚不能，太說教好悶，而本片有Bob Marley囝囝Ziggy Marley任監製，好處係真實，壞處係唔夠Deep，散場後感:「吓，就咁㗎咋。」(上映中)撰文:廖思慧
Bob Marley只有短短21年的音樂創作生涯，時間短但成績表超勁，一共推出164首歌曲，全球唱片銷量逾7500萬張。另外，1977年推出嘅專輯《Exodus》，於1999年獲美國《時代雜誌》選為20世紀最佳音樂專輯，評語係「每首歌均屬經典金曲。」而此碟亦是電影著墨最多的專輯，散場後秒下載，動蕩的年代最啱聽。
全家齊公開老竇秘密
電影獲Bob Marley家人瞓身支持，大仔Ziggy Marley擔任監製，而音樂傳記最重要嘅音樂部份，就由Bob Marley次子兼八座格林美獎得主Stephen Marley負責，而老婆及女都出一分力，就係努力尋回大量親人限定收睇的珍貴家庭影片，供製作團隊參考。甚至連Bob Marley老友亦有貢獻，將老友軼事即日常生活習慣告知團隊，務求完美還原Bob Marley嘅一生，甚至強調：「世人從未見過，連Google都搵唔到。」
蜻蜓點水式人物傳記
家人參與度大，真實還原度一定高，自然正能量滿瀉，好溫暖好有愛，但壞處就係唔夠平衡，一個人點都有啲百厭嘢，而且電影只聚焦講述Bob Marley於1976年至1978年的經歷，灌錄了個人音樂生涯最高峰的專輯《Exodus》；舉行了兩場空前盛大的演唱會；更經歷了一宗震撼全國的槍擊刺殺案，然後Bob Marley患癌病逝，終年36歲。睇完戲，完全感受唔到Bob Marley有幾追求愛同和平，片尾真實記錄片反而更加感動，好彩歌好聽，男主角Kingsley Ben-Adir又好靚仔，加上戲院聽重低音歌曲又真係好享受，但作為人物傳記片，就略嫌蜻蜓點水。
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
