政府全面撤辣後，樓市即時出現「陽春」，但到底是大陽春還是小陽春，還要看去貨韌度。不過起碼積累多時的購買力，已因可慳大筆辣稅而釋放。但目前來看，由於地產商給予大量優惠盡快「搶錢」，似乎新盤的去貨速度遠超二手。

近日打開報章亦看到一片唱好之聲，有新盤揚言收票四五千，不過你知我知，「收票」不等於賣出單位！

樓價仍在十字路口

正如「香港最大包租公」湯文亮指出，要香港樓市真真正正復甦，最重要是減息開始及香港經濟有實質改善，但這兩項重要因素仍未出現。樓價走勢其實仍在十字路口，可能再跌，當然也有機會回升。如此有乜指標可以判斷呢？

昨日與商界頂級人馬H哥碰杯，立即求支籤：「H哥你對樓市走勢點睇？究竟近日的所謂熾熱，是虛火還是實火？」

佢若有所思，將杯中的18年Macallan威士忌搖呀搖、搖呀搖，慢慢吐出：「還看超人指示！」

H哥指出，當今香港評估經濟大勢，包括分析及估計樓市走勢，無人及得上誠哥，這個已是公認的事實。故此不少新盤定價，都要睇誠哥附近的樓盤價格做指標。

黃竹坑新盤快將開價

H哥說，「碌Sir，如今最重要睇的一個超人指標樓盤，乃長實與港鐵合作發展的黃竹坑港島南岸3B期Blue Coast！項目提供642伙，已屆出售期，意即好快睇到超人出手！」

點解此樓盤具指標性？因港島南岸共有2期，提供4座總共1,400個單位，面積由289方呎至2,048方呎不等，正正在黃竹坑港鐵站上蓋，有齊豪宅格局。該盤目前正在預約參觀，但並未正式開價畀公眾認購，意即仍然未能定價！

H哥指出：「此盤因屬豪宅，正常價理應每呎賣3萬幾蚊。不過誠哥出手，出名閃電咁快，兼且若有需要，劈價唔眨眼，冇手影捉，令競爭者跟都跟唔切。這個略懂地產行情者皆知！」

H哥講到呢度，突然欲言又止，只緩緩吐出：「若果誠哥今次連豪宅都大劈價搶先吸水，等於佢完全唔睇好後市，故要快人一步嗦乾購買力。到時大家就要執生！」

資深傳媒人 曾智華

---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁：https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ