北上消費熱潮持續，剛過去的復活節長假期本港累計逾227萬人次出入境，令香港零售和餐飲業重創，各區亦接連出現店舖結業潮，社交平台Facebook群組「全港店舖執笠結業消息關注組」更在短短數天由約5,000人爆升至逾20萬人關注，引起部份本地業主及商人於群組內表達心聲。其中有商人對本地零售業心灰意冷，打算轉戰深圳創業；而在港持有多個舖位的祥益地產總裁汪敦敬就認為毋須太悲觀，甚至認為執笠潮下會衍生減租，「反而係創業良機」。
「全港店舖執笠結業消息關注組」爆紅▼
網民倡食店首要「開夜啲」
不少網民於群組內提出建議如何拯救經濟，有指「要救香港嘅街舖，無論係零售定食店首先要一齊開夜啲！自從禁堂食，食店慣咗早收，夠膽死旺角9pm好多食店已經關門，搞到已唔想出夜街」；亦有指業主對於結業潮難辭其咎，「過去經濟好的時候業主不停加租炒舖成風，導致物價上升，租金係計入去CPI的，而人工跑唔贏通脹，班業主其實一直在吸緊血，希望開徵空置稅，如果減人工的話只會損害消費能力，舖頭加速執笠」。
有業主則於群組內反駁，「我本身係業主，入來都幾日睇咗好多帖文，個個都以為我印銀紙，唔駛養人冇壓力？ 我都要請人做管理，加租係商業決定，你理得我下手冇人租？理得我吉住間舖十年。而家開個group全城聲討業主，就將冇人消費個波，射哂去物業投資者度？物業升，人工升，大家享受過個成果的！」
內地消費旺 商人欲轉戰內地
至於最受影響的本地商人，就有指「我間店四月尾光榮結業！唔係無錢賺，係業主離地式加租令我難以生存而結業」；另亦有商人指出，「次次長假期啲人都北上，我都做到心灰意冷，既然上面咁旺，諗緊好唔好試下深圳創業好過」。
持有多個舖位的大業主汪敦敬坦言，香港在服務和食物質素上，性價比的確不及內地，「我早前都喺內地食過，香港雪藏西冷點比得上內地新鮮溫體牛，又平又靚！香港賣牛肉嘅真係要諗方法求變，例如款式同品種可以有更多選擇」。
他指出，香港租金貴、難請人，服務質素退步，「落街食個飯，侍應態度唔好，香港人已經習慣晒，都廢事投訴！你有時坐的士見司機嘅質素就知服務淪亡！」汪敦敬表示在這個情況下，消費者自然選擇性價比較高的內地，所以改善好服務質素是本地零售業必然要面對的改革。
汪敦敬：有執笠潮就會衍生減租
但對於有商人表示欲轉戰內地，他認為想法太悲觀，「成街都係客，我反而覺得係創業良機！我同意係跟客走！但香港仍然有好多創業機會！有執笠潮，其實就會衍生減租、容易請人等等嘅優勢，部份吉舖地段冇咁旺，可以調節租金吸引租客」。
至於汪敦敬持有的漢口道44號地舖由人氣蛋撻店Bakehouse承租，去年更加租38%至月租25萬元，他表示生意未有受影響，仍非常旺場。
港人北上消費 內地人也在港買樓
他又指出，香港部份行業其實仍然非常暢旺，如金舖、奢侈品牌、民生店及樓市，「香港人上去消費，其實近期唔少內地人都落嚟買樓，因為香港房地產市場發展穩定，質素好自然吸引到佢哋置業」。
汪敦敬深信香港不是一無是處，「仲有得救！商家只要提升服務質素， 市民自然更願意留港消費。」他建議商家可跟內地接軌，例如透過小紅書等社交平台宣傳店舖吸引遊客。
相關文章：
港人北上熱 加劇全港結業潮 執笠關注組爆紅 成員數急升逾3萬 網民籲復活節留港消費
---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁：https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
