古淖文被批靠肥媽攞獎大反擊譚輝智顏米羔早有準備面對負評丨獨家

36歲古淖文（German）由2009年的亞視《亞洲星光大道》轉戰TVB《中年好聲音2》，擊敗譚輝智及顏米羔奪冠，封王後惹來唔少造馬猜測及大量刻薄抨擊，矛頭直指他跟評判肥媽係「(契)母子」關係，甚至有傳是「私生子」。German忍唔住反擊網民，強調契仔唔係佢；至於亞季軍亦齊護航：「German實至名歸，頒畀佢係服嘅。」採訪：方騫平攝影：朱偉彥

譚輝智(左1)、古淖文、顏米羔(右1)自參賽後成為老友。

古淖文、譚輝智、顏米羔係親密戰友。

譚輝智、顏米羔齊撐古淖文。

譚輝智和顏米羔好搞笑。

古淖文憑99分，高分勇奪《中音2》冠軍寶座，激動爆喊，評判肥媽亦起身拍手祝賀，他坦言慶功宴上肥媽開心跟他說：「《feeling good》唱得好好，有國際水準。」語畢，German馬上補充多句：「其實唔止肥媽，張佳添、周國豐、陳慧嫻都話我唱呢首歌無懈可擊，多謝評判對我嘅肯定。」譚輝智及顏米羔附和German，米羔說：「佢唱完直情呆咗，聽到起晒雞皮，歌名、故事、個moment、狀態fit晒，係Perfect Match，嘩！真係冇得輸，我哋只係掙扎。當時我同輝智喺後台互望，我話『阿古係你啦，出去直接頒獎啦…』當晚最後一位出場的譚輝智笑說：「我聽完之後，覺得自己『唔係仲唱呀？』唉！當時我pea住心態想快啲完，感覺唱最後好陰功呀。」米羔對German投晒降：「頒畀佢我服！」輝智也覺得實至名歸。

古淖文被批靠肥媽攞獎作出大反擊。

古淖文對造馬傳聞一笑置之。

輝智堅持屋企有錢對入行冇幫助。

輝智慶幸自己係素人壓力冇咁大。

決賽前夕顏米羔都有亂七八糟傳聞。

米羔一度受買fans傳言困擾。

古淖文為避嫌，強調跟肥媽只是師徒關係。

古淖文封王爆喊。

同肥媽只係師徒關係

對於外間有唔少負面聲音，質疑肥媽和古淖文「母子關係」對比賽不公平，被視作肥媽契仔的German開腔交代「母子關係」：「唉！肥媽契仔係陸浩明(6號)唔係我呀？6號真係契仔，送咗金飯碗金筷子上咗契㗎，我同阿媽係師徒，自參加完《星光大道》後阿媽就帶我去登台，好似畀咗個光環我咁，其實佢對個個都好照顧，如輝智及米羔唱得唔好都會直接鬧，唔會因為熟而特別錫我。」

肥媽經常帶古淖文出外去登台。

兩人情如母子。

當年古淖文出碟有送畀肥媽及黑妹。

9年前，陸浩明和肥媽上契。

陸浩明係肥媽真契仔。

兩「母子」主持《食平啲》系列多年。

鍾意睇負評可練強大

問到參賽期間有冇問過肥媽意見？German即彈出超過10個冇字：「冇呀！佢係評判我係參賽者，唔得㗎，但面對面時會評我揀錯歌…不過，我預咗俾人話，一笑置之，好彩心態正面，明白冇負評就冇成長，呢啲係長途賽，唔止唱歌、演戲要有進步，內心面對評論都好重要。其實負評作用好大，可以練返內心強大，大家都咁努力，但一句留言『嘩！好難聽』、『唔係肥媽一早foul咗』、『人妖』、『妖男』、『肥媽契仔』、『慧嫻最愛』等就將焦點轉移咗，冇人留意心血傑作。」問German：「咁肥媽係累咗你定係幫咗你？」他冇正面回應，只說：「因為有輿論價值，我預咗同肥媽扯上關係。」

5年前，German在《亞洲星光大道》中，演繹《Ma Ma I Love You》令評判肥媽淚崩。

肥媽大讚German唱《feeling good》有國際水準。

參賽後令German心臟強大。

German被網民嘲為「慧嫻最愛」。

古淖文歌聲獲戰友支持。

German為澳爭光。

German有強大腹肌。

「妖男」留言令German難受。

米羔輝智有大量負評

受買fans傳言困擾的米羔明白German感受：「因為我做導演及攝影，決賽前夕夠有亂七八糟傳聞，話我識晒啲明星有後台。」輝智慶幸自己係素人壓力冇咁大，負評也比想像中少：「都係彈吓我外形及樣，最多咪話我屋企有錢有後台先可以走到咁遠囉，但玩得比賽要有心理準備有好壞評論，所以唔會打擊到我，(屋企有錢對入行有冇幫助？)冇，呢個年代可以自資出歌。」至於無限創意的網民擔心German搶走6號主持《食平啲》位置；又建議TVB安排他拍《愛回家》演南亞裔角色，German強調6號和肥媽好合拍：「每人定位唔同，唔會威脅到對方。我鍾意食嘢，有機會合作梗係好。」至於拍劇，他自言記性演技都差，練返好再算。