首階段管制即棄塑膠新法例今日（22日）起實施，所有食肆禁止在堂食及外賣提供發泡膠餐具、膠飲管、膠刀、膠匙及膠叉等；而外賣則可繼續提供膠杯、膠碗及膠盒等予客人，新例實施首6個月為適應期。有油麻地售賣兩餸飯的食肆已改用走塑餐具，雖然成本增加，但負責人稱應負上社會責任，不會將成本轉嫁給基層市民。亦有食客認為雖然走塑做法正確，但需要時間適應，相信長遠可達致環保效果。
位於油麻地的一間兩餸飯食店，為配合首階段走塑新法例實施，已一律改用由「稻殼」製成的食物容器和餐具。負責人楊先生向《星島頭條》記者即場示範新餐具的使用情況，可見新款匙羮浸在湯飲中不易變形，他直言：「新餐具材質受熱耐啲，唔會咁易軟，相信用餐時間內都可以用到，（食客）唔會食到不愉快囉。」不過，楊先生提醒食客，用「稻殼」容器盛載的食物，不可放入焗爐翻熱，否則容器會被溶解。
楊先生續稱，改用新餐具和食物容器，食肆成本增加1.8%，若食客購餐時要求多一份餐具，需另加3元。他強調，由於購買兩餸飯的主要是基層市民，作為食店「會負上社會責任，暫時唔會加價，避免增加基層市民負擔」。
另一間位於佐敦上海街的外賣快餐廳，老闆盧先生不諱言要停用發泡膠餐具，經常被客人投訴外賣凍，沒有傳統發泡膠保溫，而成本亦大增一倍。他苦訴改用紙匙羮、紙飲品後，「浸一陣已經變軟，用唔到」，又慨歎：「成本咁貴點搞？冇辦法啦，可能做埋呢一、兩個月唔做（結業）」。
此外，對於第一日實施走塑新法例，市民馬先生坦言需時適應，「買返屋企食梗係冇問題，但打工仔返工又點呢，要預先自備（餐具）？用新餐具未必適應，舊嘅又話唔合法，點都要大家適應到先。」市民黃先生到燒臘店買燒味，店方今日仍然提供發泡膠飯盒，他贊成政府走塑政策，但亦認為要慢慢適應，「理論上係環保，長遠走塑係啱，但問題係唔用發泡膠又係用塑膠，政府有冇諗到咁長遠就好難講！」
燒臘店師傅：有客仔已自備玻璃飯盒及餐具
《星島頭條》記者傍晚再到大埔一帶了解，其中於廣福道經營燒臘店的周師傅表示，政府推行走塑前，已將全店的發泡膠外賣盒轉為膠兜，而餐具亦轉成木餐具，「有客仔話支紙膠管唔好，但其他餐具同膠兜就無投訴，有個客仔仲話個膠兜可以循環再用，洗一洗又用得返，又放得入微波爐」。他指政府宣佈推出走塑後，有顧客已自備玻璃飯盒及餐具，聲稱「希望可以習慣下」，他亦坦言現時轉新餐具及外賣盒，會導致成本上漲，每個月大約需額外支付近千元，但也是無可奈何的事。
採訪期間，記者發現有零星市民會主動向商戶表示不要餐具。市民何先生今日外出購買雲吞麵及紅豆沙，都有主動跟商戶表示不要餐具，「支持環保，救救地球啦，佢（商戶）畀我我都唔要呀，如果平日揸車出去，我就會自備餐具啦」。
至於在大埔鄉事會街經營兩餸飯生意的東主何先生指，現時已將外賣盒及餐具轉得「七七八八」，但近日開始有顧客自備玻璃兜到場裝餸，響應環保。被問到是否讚成走塑，他則指自己「打開門口做生意」，會盡量配合政府的要求，「政府話要咩咪要咩，你話整咩咪整咩，打工仔都要配合啦」。
記者：梁國峰 黃文威
---
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
緊貼最新最快新聞資訊，請立即下載星島頭條App：https://bit.ly/3Q29Vow
