已故麗新集團主席林百欣（林伯）家族近30億元遺產中，三太顧瑞英及女兒林明珠分文不獲，質疑林伯2004年遺囑效力，指林伯罹患腦退化症，無能力訂立遺囑。三太兒子林偉鈞今日於高等法院作供，憶述「細細個媽咪已經講話『唔好去理Daddy嘅公司，如果你入咗去做，你會畀人整死你』」，因為二房在公司中影響力龐大，林伯由台灣返港後「我成日覺得有啲嘢佢係唔同咗⋯⋯好似有個plot against （計劃對付）我哋第三房」。
為父投資2000萬蝕光 林偉鈞：比起阿哥，大巫見小巫囉
三太兒子林偉鈞出庭作證，遺囑執行人代表資深大律師文本立盤問下，林偉鈞承認任職摩根士丹利見習交易員時，曾為林伯投資2,000萬元，最後分文不剩。林偉鈞解釋因為衍生工具中有許多重新包裝，當時自己初出茅廬一知半解，但「我同我啲阿哥嘅虧損來比呢，好大巫見小巫囉」。林偉鈞憶述林伯當時當然不高興，罵得起勁，自己遂回應指「你當啲錢我攞咗囉」，後來1991、1992年左右就此向林伯道歉，自認不負責任，林伯遂拍拍自己肩膊指「learn from your mistakes（從錯誤中學習），我會繼續支持你」。林偉鈞交代由1989年到2003年左右，林伯交托了1個私人股票戶口給自己去買賣股票投資，期間投資了至少1億元，2003年底某日，公司高層何榮添來電替林伯指示結算，自己沽清持有股票後從此再沒有為父投資。
母叮囑勿入公司怕「畀人整死」
林偉鈞承認林伯一眾兒子之中，自己是唯一一個從未進入林伯各附屬公司工作，解釋「細細個媽咪已經講話『唔好去理Daddy嘅公司，如果你入咗去做，你會畀人整死你，會畀好多蕉皮你去踩』」，因為二房在公司中影響力龐大。林偉鈞又形容自小「係一個Yes Boy，同我家姐好唔同，家姐會同Daddy 拗但我唔會。以我性格，入去公司度，會死得好慘」。文本立提到匯發上海發展項目，林偉鈞指出「匯發冇阿二（二房）佢哋喺度，好簡單係我Daddy 同我媽咪，我Daddy係會保護我」。
同意父親2002年狀告母親追10億不尋常
林偉鈞確認本來林伯逢星期四和日都會花時間陪伴三房，直到2002年2月三太發出分居信為止，惟形容「佢哋鬧交好似普通兩公婆，佢哋都會時常鬧交時常話分開，and then 佢哋又話Ok喇」。林偉鈞不知悉三太提出的分居協議中有7項財務條款，惟明言情況常見。文本立提到2002年林伯狀告三太及其公司，追討10億元，又開記招指林明珠上海項目中欠款10億元，質疑情況並不普通，林偉鈞同意「有啲unusual （不尋常）」
母親與胞姊遭父攻擊 林偉鈞：覺得唔係我Daddy嚟
林偉鈞解釋赴台探望林伯時林伯狀態很差，見面不久二太余寶珠隨即到場，怒而驅逐三房家人，「嗰陣時開始不停有人影響我老豆思維，我唔知邊個去做，most likely （最有可能）林建康，因為當時林建康搵機會上位」，林伯自從1999年由台灣獲釋返港後，「我成日覺得有啲嘢佢係唔同咗，慢慢見到好多官司，好似有個plot against （計劃對付）我哋第三房」，其後林伯「搵人攻擊我媽咪家姐，覺得唔係我Daddy嚟」。
獲父贈300萬買昆明樓 林偉鈞：咁多個仔我最慳家
林偉鈞憶述林伯會不定期送贈金錢給自己，金額由5萬元到20萬元不等，有時一個月內2次，另外曾經有一次告知林伯「我要買間屋，喺昆明嗰度」，林伯遂給了自己300萬元，林偉鈞自言「咁多個仔來講我係最慳家嗰個」。林明珠供詞指林伯習慣提供金錢來展示愛意，惟林偉鈞認為其愛意和金額不成比例。
雙方關係破裂後 有次母稱「好返喇」
林偉鈞又回想雙方關係破裂後，有一次問及母親三太時，對方指「好返喇，搞掂喇」，而自己與林伯談天時，林伯「提起家姐同媽咪個口吻係軟咗好多，同埋有個關心」。文本立指其供詞從未提及上述事情，質疑說法虛構，林偉鈞否認。
稱父親2004年意識混亂認不出兒子
林偉鈞2004年有時探望林伯，有時林伯意識略帶混亂，自己身處香港，林伯卻以為自己從英國返港，又不斷重複問及相同事情，但「有陣時見佢又好正常」，當時只以為林伯年華老去身體變差。林偉鈞交代2004年6月最後一次看見林伯，當時林伯跌斷手臂留院，林偉鈞接獲大哥林建名通知前往港安醫院探望，進得房時林伯認不出自己，有旁人稱「嗰個係Eric呀」，其後林伯便叫道「好痛呀好痛呀，我唔得喇我唔得喇」，林偉鈞形容林伯當時眼神虛浮，懷疑林伯根本不認得自己。林偉鈞續指當時自己安慰林伯「你好返之後就可以返工喇」，林伯卻突然要起身，「隻手要郁喇，好似一啲痛楚都冇，所以覺得佢有幻覺」。二太一會兒後到場，高聲指「邊個來㗎？」林偉鈞為免多生事端遂先行離開，翌日再欲探訪時才得悉林伯已出院回家。
欲探望父親 長兄林建名告知：「Peter（林建岳）話唔得」
林偉鈞續指其後曾爭取會見林伯，嘗試過送花送水果均不果，自己再循大哥林建名身上入手，希望林建名能發揮長子影響力，另一方面當時又有報導指林伯訂立遺囑。林偉鈞交代2004年聖誕節前，林偉鈞赴林建名住所，獲對方告知「我已經盡量㗎喇，但Peter（林建岳）佢哋話唔得」。林偉鈞提到雖然不熟悉公司高層何榮添，但2004年從對方身上得悉自己不獲分配林伯遺產，「我係佢個仔，點解我冇份呢？」對方解釋是出於財產委員會的決定。文本立質疑上述事情從未發生，林偉鈞否認，指「我喺個court入面係唔會請大話」。
案件編號：HCAP 4/2011
法庭記者：陳子豪
---
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
緊貼最新最快新聞資訊，請立即下載星島頭條App：https://bit.ly/3Q29Vow
