楊曜愷（Ray）導演繼2019年的《叔·叔》後，在柏林影展奪得被譽為「同志電影獎項最高殊榮」泰迪熊獎的新作《從今以後》，再以長者同志為主題，跟區嘉雯再合作，還成功邀得冇拍戲33年的李琳琳出山拍港產片。腦海出現李琳琳，Ray全靠睇舊電視劇《輪流轉》和《民間傳奇-梁山伯與祝英台》。區嘉雯大讚李琳琳演技完全無生疏，跟她演繹相交逾40載的情侶相當投入，拍親熱戲更作出主動，是一次絕佳的拍攝體驗。採訪：杜杜 攝影：羅安強
導演製作《從今以後》並非因為長者男同志電影《叔·叔》成績驕人，全因2020年他去有關同志遺產權益的講座，提到同志伴侶離開後，留低的伴侶跟對方的家人關係決裂，「3對情侶同對方家人本來都好親密，放假一齊去玩，親友啲仔女會喺佢哋屋企住，已經係家人嚟，但當伴侶走咗之後，關係可以咁快轉變，我就想寫呢個故事。」而故事以女同志為背景，Ray解釋講座的個案全是女性外，還因香港社會較保守，女同志較男同志情侶更易融入對方家庭，「但個接受其實有幾深呢？！表面上比男同志容易啲，原來當有事發生，有啲磨擦，啲嘢就會發晒出嚟！」
靠姜大衛幫手搵李琳琳
Ray跟嘉雯姐合作《叔·叔》後變熟絡，加上寫劇本時是《叔·叔》宣傳期，看到嘉雯姐跟女主角「Angie」很相似，就依着對方來寫，「嘉雯其實同《叔叔》演好師奶嘅『阿清』好唔同，佢本身好elegant，氣質同『Angie』有啲相似，外表睇好溫柔，其實裹面好硬淨、堅強，我就將呢樣嘢混合咗角色。」
李琳琳演的女同志「Pat」一角，Ray之前試鏡一直都未搵到適合演員，「呢個年紀演緊戲嘅女演員唔多，好多喺TVB做緊，電視劇會好深入民心阿媽形象，我唔想，想有清新啲感覺。」他從舊電視劇中尋找，看到李琳琳在《輪流轉》的演出留下深刻印象，「《輪流轉》講5個女仔，李琳琳角色冇特別講拍拖，係現代新女性，好得意好清新，有個好modern嘅感覺，再睇《民間傳奇-梁山伯與祝英台》做男仔都OK，都幾俊俏喎！幾吸引！」Ray最終透過姜大衛（John哥）相約李琳琳見面，初次見面他已覺得對方好Fit角色，「佢真人好爽，都傾得幾好，問佢有冇興趣就畀個劇本佢睇，過咗幾日，佢已經話有興趣做，佢同我講啱啱拍完美劇，都有返興趣拍戲。」姜大衛受訪時曾說，以往都有人搵過李琳琳復出，只是角色劇本未能打動她，Ray亦承認《從今以後》角色吸引到對方，「有自己性格有自己故事，唔係一個附屬品嘅角色，所以佢會有興趣。」
靠工作坊培養伴侶默契
初次跟75歲琳琳姐合作的71歲嘉雯姐，在Ray安排下首見面，已好快搵到話題，「我哋年紀差幾年，都係同代嘅人，原來佢喺德望讀過書，我喺德望畢業，好得意。」另外導演再安排演員上workshop，令大家加快熟絡，對演繹相處超過40年的伴侶有很大幫助，「講真我哋事前又唔識，要做到咁好難，唔通我搬去John哥度住一排咩？！冇可能，哈哈！做咗呢啲workshop，大家有個心意溝通，唔係好多戲可以容許咁嘅交流，所以我好鍾意做Ray啲戲，哈哈！」到正式埋位，嘉雯姐覺得對方演技完全冇生疏，「好似學踩單車一樣，學過永遠都喺度，不過要少少時間熱身，哈哈！」Ray又搞笑補充，「佢丈夫仲做緊戲嘛，兩個可能喺屋企練咗好耐！嗰幾十年日日練啦！哈哈！」
嘉雯姐講到難忘戲份，就是跟琳琳姐唯一的親熱戲，她更獻出跟女性咀嘴的第一次，「琳琳姐做主動，當然我覺得係好nature，唔係因為我唔敢，我唔主動，係因為喺呢個關係裏面佢係重心，主動性強好多，於是好自然就發生咗。」這場戲另一難忘點是天公不造美，「拍嘅時候多災多難，劇本預係風和日麗一齊行山，好浪漫仲有人吹笛，點知嗰日落大雨，唯有轉去個亭度拍。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
