拜仁今年黑過墨斗，只能怪哈利卡尼腳頭唔好。資料圖片
季尾唔少球隊都接近收爐，近期焦點或許都係放在歐聯，而當中最令人笑到噴飯的，首選當然係由熱刺轉投拜仁慕尼黑的哈利卡尼。呢位無捧過盃的球星又真係黑過墨斗，拜仁慕尼黑十二年來都未試過盃仔都無隻，今屆在聯賽輸畀忽然發神經的利華古遜都仲叫情有可原，但德國盃仲要輸埋俾隊丙組仔，繼而在歐聯4強，兩回合犯下最少3個嚴重錯誤下而輸畀皇家馬德里，實在係令人難以置信。
基本上對於拜仁呢個級數的球隊，在大賽犯錯已經少，何況係咁多個錯集中發生？呢個現象實在唔能夠以科學或足球常理去解釋，唔話哈利卡尼陀衰家都唔得。怕且有「近50年來最強人腳」的英格蘭，今屆歐國盃之前都可以造定幅「沉冤待雪」輓聯。
好彩，佢前東家熱刺有頭威無尾陣，季初係威係勢差啲畀佢嚇親，但原來狂跑打法只係自殺式行為，結果搞到全隊輪住大傷，成績點可以唔回落？用體能消耗和傷患來解釋狀態回落合情合理，但近幾場包括上場對利物浦時，球隊幾乎所有走位和轉送都做錯又如何解釋？好彩今個星期對住實力極弱的般尼，難怪讓到球半兩球咁深，應該有機會轉運，在主場好頭好尾。馬高
-----
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
緊貼最新最快新聞資訊，請立即下載星島頭條App：https://bit.ly/3Q29Vow
