星8卦｜「動物」同「生姐」拍拖盡使 衰咸濕斷正被飛抵死
「生姐」 已經進入人生另一境界，愛情對佢嚟講完全唔係一回事。佢啲品味完全唔關錢銀或才華事，好似「動物」呢一位，莫名其妙撻着，好快就住咗入去佢嘅港島豪宅，食嘅用嘅都係「生姐」畀，仲要係格好衰，當「生姐」工人咁使，去街市買餸都係「生姐」拎晒一袋二袋。有次去機場仲離譜，「生姐」一個人推住四個行李，「動物」好似大爺咁喺前面自己顧自己，兩手空空不知幾自在。
或者呢啲叫做還債，「動物」返大陸叫做搵到個錢，開始身痕，直到有次多手多腳搞到大佬條女，完全斷正，大佬好陰濕，完全唔出聲，只係將當日影低嘅證據交畀相熟傳媒，材料一出佢就梗係乜嘢形象都無，仲搞到好大鑊 。
「生姐」見到唔係好嬲，但覺得超級無面，於是即刻搵鎖匙佬換門鎖，亦封咗「動物」嘅電話，佢係個有咗決定就好冷靜嘅人，「動物」亦無心機去氹番條女，以為佢平時任自己舞，今次一樣過關。可惜佢計錯數，「生姐」反正無公開過呢段關係，當對方透明唔存在世上都無人話佢乜嘢，「動物」其實喺兩情相悅時去得太盡，一過女人嘅底線，就完全返唔到轉頭，絕情起嚟，女人至係最極致。
相關文章：
星8卦｜「出色」花心死纏唔肯分手 「珠女」撞正天體派對嬲到出煙
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
緊貼最新最快新聞資訊，請立即下載星島頭條App：https://bit.ly/3Q29Vow
