5月17日，部份時間有陽光，周末過後天氣轉為不穩定。市場繼續憧憬美國聯儲局今年稍後減息，美股三大指數隔晚再破頂，道指更一度升破40000大關，不過高位見回吐，三大指數最終倒跌收市。道指反覆回吐38點或.01%，報39869點；標指跌11點或0.21%，報5297點；納指倒跌44點或0.26%，報16698點。
Walmart業績表現強勁，股價升7%成為表現最好道指成份股。而股神巴菲特旗下巴郡披露其美股持倉，除已大手減持蘋果公司(按季持股量減少12.83%)之外，巴郡已累計買入接近2600萬股安達保險(Chubb)，成為其第九大美股持倉。而過去巴郡亦曾透過其子公司經營保險業務，並進行多次收購同業，因此今次入股安達未有令市場感到意外。消息刺激安達股價一度升近7%，收市亦升4.7%。至於迷因股GameStop及AMC繼續大幅回落，股價分別再急跌30%及15.3%，主要係網紅咆哮小貓日前於社交平台發出一則帖文後，未再見任何行動，跟風炒作兩股嘅散戶可能表錯情。
Independent Advisor Alliance投資總監Chris Zaccarelli指出，道指衝上4萬點為美股好友帶來重大心理提振作用。Comerica財富管理投資總監John Lynch認為，按最近技術走勢動力及強勁嘅基本因素，美股短期內將進一步攀升。不過，細摩行政總裁Jamie Dimon於彭博電視訪問中明言，美國經濟仍然面對巨大物價壓力，意味利率處於高位時間較大部份投資者預期為長，又提到綠色經濟、重新軍事化、基建開支、貿易糾紛及財赤擴大均推高物價。佢同時指出，利率高企將對地產、高槓桿企業及私人信貸造成壓力，並指地緣政治可能係明年經濟嘅決定性因素。
美國10年期債息一度升3.3個基點，至4.373厘；息口敏感嘅2年期債息亦增6.53個基點，至4.789厘。美匯指數一度回升0.27%，至104.63水平，不過美匯指數於105水平之下，對股市仍有利。
至於反映中概念股表現嘅金龍指數升2.49%。港股隔晚於夜期延續日間升勢，夜期及黑期更升至19500水平。昨日港股以逾二千億成交配合升勢，內地傳中央命地方政府購入內房企業樓盤以助其去庫存，加上今日為內地第一批長國債開售，料中港股市仍於高位震盪向上，本周將仍以升市結束，連續第四周上升。其實眼見阿爺自4月開始，不斷推出各樣政策，包括國九條，新五條等措施，以及發特別債以助內房企業去庫存，扶持中港股市之心相當明顯。中港股市氣氛確已改善，並一洗頽風扭轉弱勢，只係實體經濟能否喺多重政策下起死回生，政策成效仍存疑。不過股市永遠都係超前指標，資金炒定先亦正常，但其後能否長升長有如美股般破頂再破頂，古天后仍有保留，作為炒友順勢而行，唔好搞對抗，估底估頂就無謂做喇。今日盤中初步支持為19300，初步阻力為19650-19700。
古天后日誌
---
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
緊貼最新最快新聞資訊，請立即下載星島頭條App：https://bit.ly/3Q29Vow
