6月19日，部份時間有陽光，天氣炎熱，間中有幾陣驟雨，初時局部地區有雷暴。美國最新公布嘅經濟數據好壞參半，美股今晚假期，周二假期前好淡爭持，但最終三大指數仍告上升。不過標指盤中再破頂，收市亦創新高，今年以來已經創下第31個紀錄新高；納指雖曾倒跌0.34%，最終反覆靠穩並輕微創新高。道指收市升56點或0.15%，報38834點；標指升13點或0.25%，報5487點；納指倒升5點或0.03%，報17862點。
股王Nvidia再創新高，股價升3.5%，市值突破3.33萬億美元，超越微軟成為全球最大市值上市公司。數據分析公司Washington Service資料顯示，唔計股份拆細影響，Nvidia內部人士今年以來出售約77萬股輝達，價值超過7億美元。蘋果則跌1.1%，Meta回吐1.4%，微軟亦跌0.4%。金融股表現不俗，高盛升1.6%，係表現最好成份股，摩通亦升1%。波音跌近2%，成為表現最差道指成份股。
美股越戰越勇，連華爾街大淡友都轉軚，唔少投行亦相繼調高標指今年底目標，繼高盛及Evercore ISI後，花旗亦上調標指今年底目標，由5100點升至5600點。花旗策略員Scott Chronert解釋，「科企七雄」股價持續強勁，並預料盈利增長將擴大至其他標指成份企業，將標指成份企業今年每股盈利預測由245美元上調至250美元，同時調高標指年終目標價。
美國通脹持續 就業市場放緩
美國零售工業數據表現參差，反映通脹持續及就業市場放緩等，令消費者更謹慎。美國10年期債息最多跌7.75個基點，報4.2034厘；息口敏感嘅2年期債息挫7.89個基點，報4.6866厘。紐約儲銀總裁John Williams周二接受訪問時表示，雖然招聘活動略放緩，但通脹數據令人鼓舞；但佢又唔肯評論幾時減息，強調取決於未來經濟數據，對減息時間表未有畀太多提示。雖然美滙指數一度跌0.19%，報105.125，但強勢仍然，日圓兌美元曾低見158.23；人民幣亦於7.27水平徘徊。
至於反映中概股嘅金龍指數雖然下跌0.4%，但港股3連跌後於ADR及夜期反彈過百點，黑期今早升幅相若，再次重返萬八關，預期恒指今早高開，繼續喺萬八關口好淡爭持。如果能夠突破周一高位18122點，及上周高位18267則有望扭轉弱勢。相反，喺全部技術指標仍偏淡下，短線繼續調整，初步支持仍然係17875點，跌破周一低位17752點再向下尋底，下試250日線17588點，約17600點關料有支持，下破此關則跌破日線保力加通艏底部，或向周線保力加中線即17337點進發。
古天后
---
由即日起至6月20日，只要參加「市民對特區政府滿意度調查」問卷，即有機會贏取Panasonic護髮風筒、Casetify充電器、大家樂$50餐飲券等豐富禮品。即點擊 https://bit.ly/4csd4qL
緊貼最新最快新聞資訊，請立即下載星島頭條App：https://bit.ly/3Q29Vow
