拉明耶馬（左）年紀輕輕，前途無可限量。AP
西班牙先對克羅地亞再對意大利，俾人感覺猶有餘勁，其實西班牙真係三線都好平均，由以往嘅地上最強，變成有長有短，尤其係兩翼非常之恐怖。
想講下兩翼尼高拉斯威廉斯同拉明耶馬，每一下拋開拉扯，然之後再突破，對任何人都係產生好大威脅，左邊尼高拉斯威廉斯，經常利用古古列拿嘅Underlap，尤其係對意大利嗰下中楣波真係令人印象深刻，如果入咗真係世界波。拉明耶馬俾我嘅感覺真係唔似一個第一次參加大賽嘅球員，嗰種膽識再過人突破遠射好犀利。點解佢哋兩個有咁好嘅發揮呢？一定係靠個黃金中場，法比安彭拿受到洛迪卡斯簡迪同柏迪保護之後，可以喺中間發揮，交咗好多靚嘅直線，佢喺中間做嗰個串連好大作用。
估唔到呢隊西班牙真係咁犀利，兩對強隊都可以話完勝，而家唯一擔心嘅就係後備同正選嘅差距好似有啲大，當洛迪卡斯簡迪同艾華路莫拉達都好似有少少傷嘅情況下，佢哋又可以點樣變動，但如果完全無問題嘅情況，相信呢隊西班牙真係好大機會攞歐國盃。Willhappy
