6月26日，部分時間有陽光，局部地區有驟雨，日間天氣酷熱。聯儲局官員對利率意見唔一致，雖然有官員提出研究減息，但最新亦有官員預計今年內唔會下調利率，美股周二個別發展。道指跌299點或0.76%，報39112點；標指升21點或0.39%，報5469點；納指反彈220點或1.26%，報17717點。
Nvidia扭轉三日跌勢，股價反彈6.8%，連同盤後續彈近1%，幾乎收復周一失地。其他重磅科技股亦普遍回升，Tesla升2.6%；Meta升超過2%，蘋果、亞馬遜、Alphabet及Netflix等全面回升，晶片股亦反彈。不過道指表現強差人意，主要係波音下跌2.2%；而Home Depot亦跌3.6%，為表現最差道指成份股。
聯儲局官員對利率意見有分歧
美國PCE數據公布前，持續有聯儲局官員對利率睇法發表意見，聯儲局理事Michelle Bowman稱通脹前景存在多重上行風險，因此認為現在並非減息嘅適當時機，又預期聯儲局今年內唔會減息。
不過，三藩市聯儲銀行總裁Mary Daly表示，通脹唔係現時唯一風險，警告美國就業市場正處於拐點（inflection point），若進一步放緩將意味失業增加。雖然佢未有明示係咪需要盡快減息，但佢嘅意見反映若然息率持續高企，或對美國經濟帶嚟負面影響。
美國10年期債息一度升2.52個基點，報4.2573厘，其後回軟；息口敏感嘅2年期債息亦漲2.97個基點，至4.7531厘。美滙指數最多升0.29%至105.782，日圓持續疲弱，反覆微跌0.09%至159.76兌每美元。至於人民幣亦偏軟，於7.28至7.29水平上落。
恒指倘企穩17800 仍有望回升
反映中國概念股表現嘅金龍指數跌1.29%，拖累港股ADR及夜期跌過百點，回落至萬八關之下，黑期今早表現相若，預計恒指低開。恒指昨日反彈至20日線（18232）即見回吐，盤中萬八點失而復得，卻出現10日線（18074）跌穿50日線（18101）第二個「死亡交叉」。恒指需要於短時間內重上50日線，即18100之上企穩，解決死亡交叉，方能擺脫下跌風險。
雖然今日低開，但預計唔會跌穿周初低位17789，如跌穿恐連前底17752不保；相反，若能企穩17800關之上，則有力回試上述交叉位。
古天后
