西班牙大軍賽前積極備戰。美聯。AP
歐國盃進入16強淘汰階段，其中一個較為懸殊嘅對碰，將會喺星期日深夜3點上演，西班牙迎戰格魯吉亞。
狂牛兵團今屆歐國盃編喺B組死亡之組，以完美9分姿態首名出線表現突出。比起以往只顧控球型忽略進攻銳利度嘅風格，明顯有所改變。兩位年輕翼鋒拉明耶馬及尼高拉斯威廉斯大有作為，令前線嘅進攻效率事半功倍，不愧為大熱之一。
今仗會對住分組賽以最佳第3名進入16強嘅格魯吉亞，格軍上仗2:0贏已經確保出線嘅葡萄牙全取3分，小組共得4分出線，能夠進入淘汰賽階段相信已經係超額完成。但到淘汰賽階段，要對住實力分子西班牙，大家必須搏命，相信西班牙並不會放軟手腳，實力懸殊之下，必須確保晉級。佩芝
