美國聯儲局主席鮑威爾於歐洲央行年會上表示，當局喺改善通脹方面已取得進展，但需有更大信心先會開始減息；其實一如既往，係偏鴿嘅，只係早前聯儲局已有提示，今年嘅減息時間表將延後，而減息次數今年或降至只有一次，大家都有晒心理準備。不過，職位空缺超預期，限制市場減息憧憬，美股周二早段缺乏方向，不過至尾段三大指數發力，最終都以緊貼全日高位收市。道指升逾百點，標指歷來首次企到喺5500點上收市，納指則創收市歷史新高。美市收市，道指升162點或0.41%，報39331；標指升33點或0.62%，報5509；納指升140點或0.84%，報18028。

Tesla次季電動車付運量跌幅細過預期，股價周一已彈6%，周二再抽升10.2%，重上230美元水平。不過近日Nvidia股價則停滯不前，隔晚逆市跌1.3%，但仍企穩120美元水平之上；蘋果公司升1.6%，收報220.27美元，盤中高見220.38美元；亞馬遜升1.4%，收報200美元，即市高見200.43美元，亞馬遜與蘋果雙雙破頂兼創收市新高，蘋果過去3個月累計已升超過三成。Visa上升1.9%，為表現最好道指成份股，其他金融股亦做好，摩根大通升1.7%，花旗升2%，美國銀行升2.3%。

大行續看好美股

加拿大皇家銀行策略員Lori Calvasina將標指今年底目標，由原本5300調高至5750點，為華爾街中最樂觀預測，較隔晚收市價仍有約4%上升空間。佢表示美國經濟強勁，足以抵消市場風險，相信任何回調只屬短暫。7月又到美股業績期，德銀首席策略師Binky Chadha則估計第二季美企盈利增長13%，主要由大型企業及科技股帶動，不過由於股價已率先炒上，反映呢個利好因素，相信業績對股市嘅提振作用唔會太大。

本周迎嚟多項就業數據，隔晚嘅職位空缺超過預期，令美10年期債息曾回吐5.14個基點，至4.4099厘。美滙指數先升後挫，最多跌0.21%至105.68，回落至106水平之下。而歐央行行長拉加德暗示下次會議後可能暫停減息，歐羅一度倒升0.09%至1.0751美元。不過日圓持續疲弱，節節向下，再續創38年低，最低見161.74兌每美元，跌0.17%。

美國於11月先舉行總統大選，但競選行情已開市喺滙市、債市以至股市發酵。上屆總統特朗普重返白宮機會大增，侵侵已表示會增加進口關稅，特別係中國貨品。而大幅增加關稅將構成通脹壓力，減低聯儲局減息機會，令美元及長債息率上升，新興市場股滙不利，人民幣近日已顯著轉弱，A股及港股亦表現偏軟。

250日線、100日線不容有失

恒指噚日又再度衝高回落，受制萬八關，收市升幅縮水至只有50點，報17769。不過美股表現強勁，而反映中國概念股表現的金龍指數反彈0.78%，帶動港股隔晚於夜期及ADR回升近點點，重返17800水平之上，今早黑期亦回升百點，預期今早恒指高開。其後料再次挑戰10日線18010，即18000關，如能維持於5日線17873及17800之上表現尚可。相反，如跌穿昨日低位17669則偏淡，從技術指標分析，250日線17534及100日線17340不容有失，否則跌勢將加劇，考驗萬七關更未必能守住。

古天后