討論區個個插Netflix電影《巴黎深淵》，又話廢又話唔驚又話無聊，啲「智者」係咁話鯊魚點可能喺塞納河生活，片中專家都有解釋，係有咁嘅可能，睇戲吓吓要好真實，建議你睇紀錄片啦，睇咩戲啫。講返套戲，我又覺得幾好睇，被嚇咗幾嘢，有緊張位有低能位有抵死位又有笑位，作為一套災難驚慄片唔算好出色，但娛樂性好豐富，會大聲笑又會出聲鬧，用嚟打發時間，幾好吖。(已上架) 撰文:廖思慧
在太平洋垃圾帶附近，海洋研究員Sophia跟一條尖吻鯖鯊莉莉絲相遇。
Sophia及環保人士 Mika(右)，前者險被後者害死。
電影故事設定在巴黎首次舉辦的世界三項鐵人錦標賽期間，一條巨大鯊魚出現在塞納河所引發的事件。點解鯊魚會出現喺塞納河？ 時間回到3年前，海洋研究員Sophia(Bérénice Bejo飾)同佢老公，一直有研究一條尖吻鯖鯊莉莉絲，落晒追蹤器方便追蹤，一次意外，Sophia老公同團隊被莉莉絲咬死，女方傷心到爆決定退隱在水族館工作。有一日，環保人士Mika話畀Sophia知，莉莉絲嘅追蹤標籤仍然活躍，更從太平洋游到去塞納河，似乎被困巴黎，而鐵人賽就快舉行，心都寒埋。
Sophia發現莉莉絲啲家族鯊魚可以無性繁殖，慘嘞。
發現塞納河有襲擊人類嘅鯊魚，巴黎警察會潛落水睇吓，好好笑。
市長唔理市民死活，最緊要搞好三項鐵人賽。
蠢爆人類被鯊魚嚴重玩弄
之後Sophia及環保人士跟警察指揮官Adil聯手，想將鯊魚趕出塞納河，睇到呢度，係咪已經覺得好好笑？Netflix以6個字介紹呢套戲，就係不祥、嚇人、懸疑，我就簡單三個字講完，超諷刺，全片最好睇激進環保份子同官僚一步步將件事越搞越大件事，總之以上人士嘅行為睇到你越不爽，尾段見到佢哋自食其果就越快樂，開放式結局完全估佢唔到，想睇續集喎。
三項鐵人賽如常舉行，最開心係啲鯊魚。
一大群鯊魚可以吃到飽。
鐵人賽開始無耐已經有大量運動員被鯊魚襲擊。
開放式結局好精彩，導演諗嘢都幾黐線。
將塞納河搞到血流成河就梗係要靠綠幕啦。
