7月8日，大致天晴，但有一兩陣驟雨，日間天氣酷熱。回顧美股上周表現仍亮麗，雖然道指僅升0.5%，但標指升近2%；納指則升逾3%，兩者再創紀錄新高。美股造好主要因為美國公布的6月非農業職位增幅低於預期，市場對聯儲局9月減息預期回升至70%，利好美股。因此，市場本周首要焦點係周四公布美國6月CPI，以及鮑爺（鮑威爾）於周二及三分別喺參眾兩院出席聽證會，發表對經濟及通脹睇法，呢啲因素將成為投資者評估聯儲局9月減息嘅重要指示。經濟師預期，6月CPI將錄得3.1%按年升幅，低於5月嘅3.3%，按月料升0.1%，略高於前一月未有變動，核心CPI料升3.4%及0.2%。數據可能進一步確定通脹趨向放緩，引領聯儲局9月減息揣測進一步白熱化。
亦要睇實美藍籌業績期
除咗CPI數據之外，第二個焦點係本周開始踏入藍籌業績期，先由百事及達美航空揭開序幕，不過摩根大通，富國銀行及花旗等三大銀行股周五公布季績更受市場關注。銀行股季績受到重視，是因為標指40%係銀行股。市場預期銀行股盈利唔會勁升，按年升幅料平均為4.3%，而地區銀行股有較佳表現，平均升幅可能達26%。銀行股業績將成為標指整體表現能否保持良好嘅關鍵。市場預期，標指成分股第二季盈利平均升幅為8.8%，將會係2022年首季以來最佳。
高盛策略師David Kostin指出，藍籌平均盈利預測強勁，因此要達到業績超出預期門檻亦相對地高，所以佢對於季績消息可推動現已處於高位嘅標指再創新高有保留。花旗策略師Scott Chronert睇法接近，擔心藍籌季績即使能優於預期，但美股再升動力減弱。而德銀策略師Binky Chadha相對樂觀，標指喺藍籌季績期上升可能性達到80%，平均升幅為2%，因此佢對於未來幾個星期美股仍抱樂觀睇法。
續反覆向下機會較大
至於港股上周再下試250日線(17527)後反彈，由中特估板塊支撐大市重返萬八水平，可惜此關得而復失，加上其他指數權重股未能跟上，成交亦未配合，整體動力未見增強，對後市宜保持警覺。走勢上，恒指受制早前微型浪頂18520，自5月20日創下19706本年高位後，一浪低於一浪模式未有改變，暫時以反覆向下運行發展機會較大。本周除咗美國公布CPI之外，內地亦會公布進出口數據及6月信貸等，中美通脹皆揭曉。短期港股仍欠缺催化劑推動，雖然下周內地將舉行三中全會，但觀乎上周港股表現，市場對此並不賣帳，主要係4月內地推出組合拳救樓市，撐經濟以來，暫未見有太大成效，市場對於今次三中全會亦未有期望。港股上周五再失所有移動平均線，如本周下破17500重要支持，恐怕再向下往17000-17200尋找支持。相反，能重返萬八關企穩，仍要睇能否突破18500短期頂部，否則港股仍然係半生不死嘅狀態，難以突破。
古天后
