體操港將石偉雄在巴黎奧運資格賽以第14名完成跳馬項目，未打入最後8強的決賽，3度征戰奧運舞台以此告終。石仔周一在社交媒體發文總結，表示自己已經做足本份，包括4次冒斷腳風險打針，又曾經為腰部做手術，才能夠換來再一次上奧運賽場比賽的機會。
由倫敦奧運、東京奧運去到巴黎奧運，加上仁川亞運及耶加達亞運兩次跳馬金牌，石偉雄為香港體操界別付出一切，甚至不惜冒斷腳風險上場比賽。
完成巴黎奧運之後，石仔在網上總結今次經歷：「巴黎奧運呢一段經歷完結啦。今次成績雖然未如理想，但係我做到自己需要做到既本分，做到享受呢個舞台，做到平常心完全冇壓力咁去比賽，我對得住自己，珍惜每一日仲可以練習同比賽既機會。」
「由上屆東京奧運，要決定喺巴黎見大家，我做到啦，我好感恩可以第三次去奧運，好感恩呢三年陪我一齊癲嘅教練（佢而家都係總教練），裁判，治療師、醫生，屋企人，每一位幫過我既人，好感恩喺我背後默默支持我陪住我經歷高低起跌既嘅香港市民。」
「呢三年既路已經唔可以用崎嶇嚟形容，要去世錦同奧運，一定要用世界盃拎積分嚟拎資格，所以由22年頭開始我兩隻腳一直有傷都好都唔可以休息，特別係由上年世錦拎唔到資格後，我即刻做左個腰手術，我同醫生講唔好話比屋企人知，我自己一個人出入醫院就得嫁啦。」
「之後就要馬上轉用4站世界盃拎資格，好好彩最後我都拎到去巴黎既入場券，呢個『好彩』並唔係真係好彩既意思。由1月去荷蘭集訓到4站世界盃，係第1站同第4站之前，我好低調即日來回荷蘭香港返黎打消炎止痛針。」
4次打消炎止痛針，可能令到石仔冒斷腳風險，但是他仍然選擇繼續。石偉雄回憶道：「打第一枝既時候，醫生話，會有斷既風險。我話明白，冇問題。」
到打第二枝
醫生話：你上次打完唔夠兩個月喎
我話：係丫，隻腳頂唔順啦，又痛過
醫生話：唔好打咁密，兩個月打兩枝唔得嫁
我話：我唔怕丫，揀得去就冇得怕，都最後一站啦，我唔想係呢個時候跑唔到，我情願斷都唔要三五七十年後後悔自己點解當初唔行多步。
到去奧運前3星期，呢個時候又黎，諗都唔諗同總教練講返香港打多枝
到第三枝
醫生：好，即刻幫你安排，之後佢冇再講野
臨去奧運之前我再問醫生如果要再打多支你可唔可以嚟法國幫我打？醫生話：我睇吓情況啦，如果行得開可以嚟睇你比賽幫你打多支支援你。係最後比賽前幾日醫生都嚟咗法國幫我打多支，令我可以冇顧慮同安心咁比賽，呢個比賽結果我覺得最無悔無憾啦，呢個過程我好滿意。
另外，我去奧運之前問左兩位治療師可唔可以黎睇我比賽，佢地諗都唔諗即刻話黎，佢地即刻唔做生意即日飛過嚟睇我比賽，多謝你地。
真係太多人要多謝同感激，多謝每一位幫過我既人，我呢一世都會記得，多謝你地飛過嚟睇我又好，睇電視支持我又好，比完賽我收到每一位行過路過市民都講聲respect, proud of you,呢樣係我最想見到嘅，多謝你地支持我，留意香港體操呢個運動，留意香港既運動員，感恩。
「最後，我呢26年嘅體操生涯從來都冇多謝過我自己，多謝你26年嘅堅持同努力，艱難左26年都冇放棄，當我有78歲命，你堅持咗1/3你嘅生命日復日年復年咁做，石仔多謝你。」
石偉雄在社交媒體的總結，引來外界紛紛留言鼓勵及支持。他的教練塞治也在網上撰文，感謝石仔多年來的付出。
塞治教練撰文如下：
親愛的石偉雄，
你在競技體操領域超過20年的旅程，成為堅定奉獻和不屈精神的光輝典範。你克服的挫折和所達到的成就，展現了人類意志的力量。你展現的紀律、野心和毅力，確實是對香港體操隊新一代極大鼓舞，是讓有抱負的年輕體操選手效仿的模範。
他們將以你的成就為證據，證明通過努力、堅持和對成功的渴望，終有一天可以成為強大的人。你的故事將激勵他們追求夢想，接受前方的挑戰，並在逆境中永不放棄。
你寫下的歷史將激勵新一代體操選手延續香港卓越的傳統，將標竿提得更高，並在這項運動上留下難以磨滅的印記。你的道路已經開創了先河 - 現在輪到下一代追隨你的腳步，寫出他們自己的傳奇。
我為你感到無比驕傲，
Sergiy Agafontsev
