8月5日，大致天晴，局部地區有驟雨，日間天氣酷熱。美股上周顯著下跌，由於本周缺乏重要經濟數據及重磅股業績，焦點將落在聯儲局官員講話上。回顧上周，道指跌2.5%，標指亦跌逾2.5%，納指更跌3.7%，主要係因為美國經濟數據欠佳，市場憂慮聯儲局遲遲未減息，經濟可能要硬着陸，加上科技龍頭股季績麻麻，兼且調低預期，觸發強大獲利沽盤。

而今個星期較重要嘅數據，係周一公布嘅美國供應管理協會(ISM)的7月服務業指數終值市場預期為56點，與前一月相同；其餘較重要指數為慣常公布嘅上周首次申領失業人數。有市場人士估計，如果無進一步不利消息，大市可能有輕微反彈。市場亦關注聯儲局官員講話，包括三藩市聯儲銀行總裁Mary Daly及里士滿聯儲銀行總裁Thomas Barkin。而本周較受關主嘅業績，包括迪士尼及超微半導體等。至於內地本周亦有唔少數據公布，包括包括服務業指數，貿易及消費物價指數等等。上周，中國經濟數據欠佳，令外間憂慮當地經濟增長將顯著放緩。

初步支持16670

日圓拆倉潮引發全球股市下跌，似乎跌勢至今早仍未停止，日圓兌美元升至145水平，日經指數今早曾再跌逾2000點。至於港股亦難獨善其身，上周五恒指跌至16865低位，為4月23日以嚟新低。不過以一周計，恒指僅跌76點，報收16945。港股維持自7月中以嚟連跌兩周劣勢，今早再受外圍股市續挫，及中東局勢轉趨緊張影響，黑期再跌至16700水平。預期大市再裂口低開，能否反彈仍屬未知數。而上周五大市所遺下嘅裂口底部17075將成為今日反彈阻力，初步支持為16670，此位置為今年1月低位升至5月高位浪段回調黃金比0.618，而大市未能重返17250水平，即此浪段黃金比0.5，難言回穩，若外圍情況持續疲弱，港股亦只有繼續向下尋底。