林郁婷（左）被質疑參賽資格及性別而成為焦點。中新社

有冇諗過，忽然有一日，自己會被其他人「定義」你唔係男人/女人？經過今次奧運之後，我意識到一樣嘢，就係唔好咁肯定以為自己係男人或者女人，咪以為自己胯下有多幾両肉就可以肯定自己係男人咩？唔算，又或者自己「事業心」重就認定自己係女人，都唔一定，你自己講唔算數，縱使你儀表出眾，靚仔到好似魏浚笙咁，曾經縱橫情場。呢啲統統都唔係證據，除非你做過基因測試，個報告話你係，你先有資格宣布你自己的性別。

在國內，網上小說和電影出現極大量的「穿越」題材，數量多到令人覺得智商有問題的程度。其中有部分，就係講到主角「穿越」時代，附上另一個人身上，一覺醒來，發現自己不是自己，每個主角都會立即接受自己新的身份，完全唔會對自己有任何認知障礙，但在現實之中，若然忽然被人科學地「證明」你唔係男人/女人，我完全想像唔到可以點接受呢個現實？

非常同情那兩位被拳擊組織定義為非女人的運動員，作為那百分之一的異數，身體有XY染色體，在生長或樣貌上會偏向男性，大概在成長過程中都唔會被人當女咁錫，大個咗更難找到男朋友，難得那個可恨的DNA出錯，讓自己在運動找到身為女人的喜悅和優越，都要被剝奪埋，會唔會太唔公道呢？馬高