曾接受《東張西望》訪問的何伯與何太自從節目播出後，一直都成為網民的焦點，近期因為何太堅拒將何伯的名字加入公屋而租住酒店避違規，不過兩人又因屢被投訴而要敗走，但兩人仍堅持周街開直播。日前何伯在直播上「認親認戚」：「你唔知我哋姓何嘅家族喺澳門係幾大？你查一查同澳門姓何嗰啲有乜嘢關係？」昨晚（19日）翁靜晶於YouTube頻道「危險人物2.0」亦有談及何家的親戚關係。
相關閱讀：翁靜晶講解「一晚五次」論原來暗藏玄機 或與香港婚姻條例相關：原來有人好識法律
翁靜晶談何家的親戚關係：
翁靜晶昨日在直播中談到何家的親戚關係：「我而家喺澳門，何生都有好業務喺度，我又講吓你聽，我哋啲親戚係乜嘢嚟，你知唔知點解我哋姓何？你覺得何氏宗親會、何東家族甚至何鴻燊家族，佢哋個族譜同埋祠堂喺邊度？我哋都係寶安縣人，但係點解何家係寶安縣嘅人，原因好簡單，因為佢哋出身嘅地方喺香港，香港係屬於寶安縣，點解佢哋姓何？係因為佢哋嘅祖先係嚟自荷蘭。唔係因為佢哋嘅祖先係有一個姓何嘅中國人，成個何家嘅第一個祖先，就喺1800年嗰早期年代，有一個叫Charles Bosman嘅人，呢個Bosman譯為何仕文，佢係荷蘭領事，佢一個人嚟到香港之後，咁佢哋都有『何伯的需要』，佢哋會搵啲水上人家嘅女仔一齊。」
何東家族不是姓何
翁靜晶續說：「何仕文當時搵咗個姓施嘅女仔一齊，呢個姓施嘅女仔即係何東個媽媽，佢生咗幾個半東半西嘅人，所以何東嗰本外國護照係寫住Bosman而唔係姓何，但係喺以前嘅社會，會叫呢啲不中不西嘅人做雜種，係畀人睇唔起，佢哋為咗要得到中國人嘅認同，佢哋會着中國人嘅衫，改中國人嘅姓，所以如果你係一個姓何嘅中國人，你話係我哋嘅親戚，就好似有啲奇怪，因為你睇清楚佢哋啲樣，何彪個樣更加唔使講，直頭係個白人，佢哋個家族就溝咗幾多代都好，用DNA嚟驗，都係有白種嘅血統，所以唔係真係姓何，唔好『揦埋當風濕』，根本係冇人姓何，係荷蘭嘅意思。」
何太曾對號入座回應翁靜晶？
借人哋嘅光環去恐嚇人：有啲過份
後來翁靜晶更分享一件 「好得意嘅嘢」並說：「以前啲女人喺英國同香港嘅法律，原來都係屬於男人嘅物品，所以女人未婚係屬於父母，嫁咗就屬於丈夫，老咗就屬於啲仔，所以你係冇辦法擁有自己嘅財物，但係嗰陣啲女人同洋人一齊係好着數，佢哋可以着洋服，仲可以擁有物業，因為佢哋係洋人嘅女人，如果嗰個洋人走嘅時候，又會將佢哋轉過去畀另一個朋友接收，當然而家睇會覺得呢個過程好悲哀，甚至乎又唔係好道德，我哋每個人都會有自己嘅歷史，我哋唔需要扮晒魚蝦蟹，借人哋條裙肚嚟冚自己對腳，借人哋嘅光環去做啲咁嘅嘢，借人哋嘅光環冚自己對腳去扮叻，扮威都可以，但係你借人哋嘅光環去恐嚇人，話畀人知你識邊個邊，有惡勢力，喺澳門又點點點，呢個就有啲過份，我可以肯定話畀你知，嗰條友又唔係親戚。」
其他文章：
東張西望丨何伯強調「一晚五次」冇講大話！狂揸何太玉臂緊盯心口 直播濕吻零尷尬
翁靜晶剖析76歲何伯事件？推翻承繼並非易事 《東張西望》訪問片是最好證據
