9月10日，部份時間有陽光，有幾陣驟雨，日間天氣炎熱。美股經過上周持續下跌，隔晚終有投資者趁低吸納，周一顯著反彈，道指更一度升逾600點，重返41000水平。道指收市升484點或1.2%，報收40829；標指升62點或1.16%；報收5471；納指升193點或1.16%，報收16884。俗稱「恐慌指數」嘅VIX則回落12.6%至19.56。隔晚市場集中留意蘋果產品發布會，今晚焦點將會係美國總統候選人賀錦麗與特朗普舉行首場電視辯論。
重磅股中，Nvidia及Tesla收市股價分別彈3.5%及2.6%，亞馬遜升2.3%。波音公司跟其最大工會達成薪酬協議，有望避免因罷工干擾飛機生產，股價回升3.4%；Verizon抽高3.8%，為表現最好道指成份股。數據分析公司Palantir及戴爾（Dell）獲納入標指成份股，股價分別升14.1%及3.8%。
蘋果公司於加州總部舉行產品發布會，當中，預期宣布推出支援人工智能(AI)功能Apple Intelligence嘅iPhone 16系列智能手機。同時，Apple Watch及AirPods自2022年底以來首次進行重大革新。不過市場似乎對iPhone16未有太大驚喜表現不滿，發布會尾段蘋果股價曾逆市跌1.9%，收市則輕微轉升不足0.1%。華為緊接於周二舉行發布會，估計全球首款量產三摺手機華為Mate XT正式登場，目前預約訂購人數已超過321萬人。
美國經濟軟着陸機會仍大過硬着陸
標指上周連跌4個交易日，累跌4.25%，為1953年以來最差嘅9月開局。研究機構Sevens Report總裁Tom Essaye認為，美國經濟已明顯地失去動力，不過軟着陸機會仍大過硬着陸，而市場已出現輕微技術買盤。摩根士丹利策略員Michael Wilson則表示，套息交易拆倉依然係股市風險之一，聯儲局如果本月大幅減息將導致日圓進一步轉強，或引發美國風險資產嘅負面反應。佢預期市況喺下周聯儲局議息前維持波動。紐約聯儲銀行調查顯示，8月份消費者嘅1年通脹預期從7月的2.97%，輕微增至3%。
美國10年期債息曾升5.7個基點，至3.765厘，息口敏感嘅2年期債息亦升6.19個基點，至3.7081厘，交易員押注聯儲局下周減息0.5厘機會率，由上周最高約50%回落至約20%。美滙指數最多升0.51%至101.7，日圓回落1.05%至143.8兌每美元。
反映中概股嘅金龍指數反彈0.69%，隔晚夜期跟ADR略為回升，重返17200水平，預期今日大市略為高開。但港股由9月開局至今連跌五個交易日，由上月高位已回落逾千點。幸而昨日成交略見回升，反映現水平雖然有人掟貨，同時亦有資金願意入場接貨，如成交持續錄得錄千億元，或有望令大市起死回生。相反，如持續成交低迷，大市將出現陰乾式下跌，一旦跌穿16950水平，大市或穿前底。是日初步支持17150，較大支持為16950-17000；初步阻力17280-17300，最大阻力為17400-17450。
