英偉達剛破頂 估值盈利未見頂 上望幾多？｜晉佳
美股資金梅花間竹炒作傳統股及科技股，噚晚英偉達（Nvidia，NVDA）一枝獨秀，上升4%、突破140美元關口。由於6月20日創下140.75美元高位後，足足4個月才再破頂，儲夠力展開新一輪升勢，基本上望160美元懸念不大，下一個目標180美元。
剛過去周末，天風國際證券分析師郭明錤發佈消息，指微軟（MSFT）將英偉達最新數據中心GPU產品GB200第四季訂單，增加3至4倍，其實並非驚喜消息，但微軟此舉等於提早引爆AI資本開支增加嘅利好，令市場對於未來幾個季度嘅英偉達盈利預測更有信心。
盈利只會超預期 不會低預期
市場目前預測，明年度（2025年2月至2026年1月）每股盈利4.06美元，最新消息提及英偉達GB200訂單喺未來一年爆滿，而且明年下半年英偉達的升級產品B300亦會推出，幾可肯定明年度大行盈利預測能夠達成，從目前預測數字睇，只會超預期、不會低於預期，難怪投資者周一願意搶高英偉達股價。
AI GPU需求有分為訓練需求及推理需求，英偉達AI訓練功能上嘅壟斷難被打破，推理功能方面，其產品仍然係性價比最高。過往一年科技企業需求反映增長尚未飽和，其中推理需求方面，近期生成式人工智能產品喺使用高峰仍會出現間歇窒機情況，各大科技巨頭仍然積極提升算力。英偉達嘅盈利前景，相比一年前更理想，於是刺激股價持續上漲未見頂。
英偉達預測明年度市盈率35倍左右，以其數據中心GPU產品仍然保持壟斷狀態，競爭力甚至進一步拋離對手，呢個估值似乎未夠癲，如果目標價訂於180美元，預測市盈率45倍左右。
晉佳
相關文章：
憧憬減息 錯沽股票 債券今年跑輸大市近30% 「今年輸錢的 要深切反省」｜李聲揚
港股曾穿兩萬關 月內低位或未見 惟整體仍屬中期急升後調整｜郭Sir
