Tesla（TSLA）10月初公布季度交付數據、以及10月10日宣布Robotaxi計劃，令投資者非常失望，股價由接近260美元跌至周三晚收市213.65美元，卻以一份季度業績，令股價收復一半失地，究竟呢份業績嘅含金量有幾高？
一半原因歸功於長遠願景
今次季度業績後，Tesla股價盤後反彈約12%，一半原因歸功於成本下降令盈利超預期，一半歸功於Tesla行政總裁Elon Musk亡羊補牢，喺業績web cast上提出低成本汽車、CyberCab（即Robotaxi）更詳盡計劃。今次業績後，釋除咗交付量不足而影響盈利能力嘅負面因素，同時給出更詳細嘅長遠願景，股價理應有條件反彈至250美元以上，假如250美元都達不到，就反映投資者對於Elon Musk及Tesla嘅信心出現動搖。
今次季度業績當中，收入錄251億美元，略低過預期嘅255億美元；每股盈利0.72美元，高於預期嘅0.58美元。經營利潤率回升至10.8%，係2023年第一季以來最高。上季Tesla出貨量增長主要來自中國，或許更集中中國生產令成本效益提升，帶動盈利勝預期。
CyberCab生產目標嚇親人
喺業績web cast上，Elon Musk提到，低成本版汽車將會喺明年上半年推出，因此帶動明年整體出貨量上升20%至30%。至於CyberCab嘅生產目標更加係嚇親人，2026年開始生產後，未來計劃每年至少200萬輛，甚至係400萬。另外，Tesla自動駕駛服務FSD V13 亦喺明年1月推出。
Elon Musk將未來幾年利好消息一次過派發，誠意搭夠，但冇人期望Tesla能達成上述目標，Web Cast上人人懶得追問Tesla如何執行細節，因為人人對於Elon Musk吹大咗，一早習以為常。Tesla如何推出低成本汽車而保住Model 3銷情？從而達成出貨目標？即使有能力大規模生產CyberCab，點樣如期2027年獲得監管機構通過自動駕駛落地？低成本汽車同CyberCab定位極相似，點樣吸引顧客買部似Taxi嘅私家車自用？呢一連串嘅計劃，係Tesla多年來最模糊而不可能嘅一次。
倘未見進度 估值或返回人間
短線或許能獲得投資者「俾個面」，再度炒一轉，上試250美元樓上。長遠而言，Elon Musk正在考驗信徒嘅耐性，假如一、兩年內見唔到Tesla按進度提供收入、盈利增長，估值恐怕逐步由天堂返回人間。以第三季每股盈利年度化計，市盈率約80倍。
Elon Musk吹得越大，反映情況越逼在眉睫，長線股價壓力越來越大了。短期股價會受到刺激，但要留意Elon Musk大約兩年不減持股票嘅承諾，喺今年年尾屆滿，估計新一輪減持始終會來。
晉佳
相關文章：
港股成交金額縮小 郭Sir籲觀望為妙 大市形態反覆欲試底｜郭思治
憧憬減息 錯沽股票 債券今年跑輸大市近30% 「今年輸錢的 要深切反省」｜李聲揚
