希望美斯可以最後一舞奪冠封頂。Reuters

世界盃終於嚟到決賽，相信唔需要再多介紹法國同阿根廷，所以筆者索性做啲有趣嘅比較。

王牌：球王美斯同基利安麥巴比，同為巴黎聖日耳門效力，球會中佢哋合作無間，國家隊則分別為兩隊進攻核心，決賽前同樣已攻入五球。

前鋒：兩隊王牌嘅拍檔基奧特同祖利安艾華利斯，係球風完全相反嘅球員。基奧特善於頭槌及背身護球，而艾華利斯則善於鑽營且速度高。有趣嘅係兩人本來都唔係首選，因隊友受傷及表現不濟先有機會，但表現相當出色。

中場：迪保羅同基沙文同樣嚟自馬體會，兩人都做到穩定中場同保護防線，亦係吹起反攻號角嘅第一人，尤其係基沙文喺國家隊逼於無奈之下轉型成功，前仆後繼嘅踢法被普巴大讚佢係「基沙文簡迪」。

防線：雙方都有明顯缺點，法國烏柏美卡奴大意莽撞，奧達文迪不善應付高空攻勢。好在龍門洛里斯總算生性，上仗對摩洛哥打出代表作，達米安馬天尼斯亦屢救險球，全靠佢撲出兩球十二碼戰勝荷蘭晉級。

不知不覺已經到最後一期世界盃專欄，最後筆者少少私心，希望美斯可以最後一舞奪冠封頂！多謝各位睇到呢度，嚟緊有機會再見。  - 球樂

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ